Rammeavtalen som er inngått med kommunen inneheld opsjon på ytterlegare to år.

- Avtalen omfattar både arkitekttenester, arealplanlegging og rådgjevande ingeniørtenester innan ulike fagområde (sjå faktaboks). I tillegg skal våre folk ha rolla som leiarar av prosjekteringsgrupper i einskilde prosjekt, fortel dagleg leiar Gisle Heggebø i Omega Areal. 

Personell frå Omega Areal sine kontor på Stord, Frakkagjerd og i Ølensvåg kjem til å arbeide med prosjekta i Suldal. Oppgåvene omfattar alt frå planlegging og gjennomføring av prosjekt fram til drift. 

- I planleggingsfasen skal me hjelpe kommunen med forprosjekt, skisser, kalkylar, prosjektering, tilbodsgrunnlag og reklamasjonar. I samband med utarbeiding av tilbodsdokument, skal me sjå til at prosjekta vert handsama i samsvar med lover og forskrifter om offentlege anskaffingar, og at eige og offentleg tilbodsregister vert nytta. Me skal og rådgje kommunen i gjennomføringa av prosjekta og elles støtta dei der det er naturleg i høve til avtalen, fortel Heggebø. 

Morselskapet i ryggen 

Mellom tildelingskriteria har kommunen vektlagt pris på tenestene høgast, men kompetanse og erfaringa til dei tilbydde kandidatane har òg vore med i vurderinga. 

- Det har heller ikkje skada at me har morselskapet Omega i ryggen, med tilgang på konsernet sine prosjektstyringsverktøy og elektroniske kommunikasjonsløysningar. Eit av krava frå kunden var at all korrespondanse frå planlegging til faktura må kunne skje elektronisk, og der har me gode løysingar, understrekar Heggebø. 

For utføring av oppgåver innan tekniske fag har Omega Areal fått med seg ingeniørselskapet Aritech frå Stord.