– Eg veit at dette fungerer, og har så sterk tru på at det er viktig å førebygge psykiske utfordringar, seier Tone Ekrene Steinstø. 

Som terapeut har Tone Ekrene Steinstø møtt mange som har strekt strikken for langt i kvardagen, no vil ho førebygge pyskiske sjukdommar. (Foto: Kristian Risanger)

Ho har over 30 år med erfaring som psykiatrisk sjukepleiar, og har eigen praksis som kognitiv terapeut i Ølen. Steinstø har møtt mange skjebnar i utfordrande situasjonar. Felles for dei, er at problema har hopa seg såpass opp at dei ikkje klarer å navigere i det lenger. Pasientane treng profesjonell hjelp for å finne perspektiv og kvilepuls igHeile 80 prosent av pasientane som har tatt kontakt med henne har strekt strikken for langt over tid, og blitt fanga av hamsterhjulet i kvardagen. Steinstø vil gjerne gjere ein forskjell, og då helst førebyggande.

– No tar eg ikkje inn fleire nye pasientar, med unntak av at  eg fylgjer opp dei eg allereie har og tar inn menneske som opplever livskriser. Framover vil eg fokusere på føredraga eg kan tilby bedrifter, organisasjonar – eller vennegjengar, for den del. 

– Dette er høgdepunkta eg har samla frå alle samtalar eg har hatt som terapeut, og her får dei tips om korleis dei kan handtere eigen kvardag på ein betre måte. 

Inga lettvint løysing

Tone Ekrene Steinstø vil inspirere bedrifter, organisasjonar og vennegjengar til å setje fokus på psykisk kvardag. (Foto: Kristian Risanger) 

Steinstø fortel at kognitiv terapi ikkje er ei lettvint løysing, i denne terapiforma må pasienten og terapeuten jobbe hardt saman for å oppnå resultat. Det krev mykje av begge partar, men på den andre sida er gevinsten stor når pasienten går ut i verda og er betre rusta for å møte det livet byr på av opp- og nedturar. 

– Det blir det same her når eg møter bedriftene. Sjølv om dette ikkje er ein-til-ein-samtale, så får dei nyttige verktøy med seg som dei kan bruke både på jobb og privat. Eg trur eit slikt førebyggande arbeid er ei god investering for bedrifta, som kan sjå resultat både på mindre sjukefråvær, meir trivsel på jobb og til slutt i betre resultat på botnlinja, seier Steinstø. 

I føredraget er ho innom tema som vanskelege tankemønster, kosthald, fysisk helse, relasjonar og kommunikasjon på arbeidsplassen. Steinstø snakkar også om ansvaret kvar enkelt har for å ta ansvar for eige liv. Sjølv om det kan vere mange i salen, trur Steinstø at ein som regel klarer å treffe nokre tema som alle kjenner seg igjen i. 

– Eg hjelper dei til å bli bevisste på kva som ikkje fungerer, og sår eit frø. Det viktigaste er at kvar enkelt får motivasjon til å ta tak i eigen kvardag. Så er det klart og utfordringar ein ikkje styrer så mykje med, men ein kan øve seg på korleis ein best handterer det. Nokre gonger handlar det og om å setje rammer, seier Steinstø. 

– Det har vore veldig gode tilbakemeldingar på dei føredraga eg har hatt så langt, eg trur folk set pris på dette. 

Sjølv om Tone Ekrene Steinstø ikkje tar inn nye pasientar i praksisen sin så vil ho fylgje opp tidlegare pasientar, og har alltid rom for dei som opplever ei livskrise. (Foto: Kristian Risanger)

– Ta tak i det!

Steinstø er glad for at psykiske problem er meir omsnakka enn det var før, og at det er meir akseptert å søkje hjelp både før problema veks seg store, og når krisa er der og alt blir for uoversiktleg til at ein kan rydde opp sjølv. 

– Det er jo først når ein blir bevisst at ein har utfordringar at ein kan skape endring. Ein må forstå kva ein står i, og så blir nok aksepten for andre og større når ein veit kvifor folk reagerer slik dei gjer. Alle har med seg sin eigen bagasje som påverkar dei, seier terapeuten. 

– Og ein skal vere skikkeleg sjuk for å få hjelp vidare i det offentlege systemet, difor er det viktig at me kan tilby eit førebyggande tiltak og ikkje minst hjelp når det trengst her lokalt. Eg trur mange spring slik i hamsterhjulet at dei ikkje klarer å vere tilstades i eig liv. Og ungdommane har eg ekstra sut for, ikkje minst dei som opplever det evige jaget om å bli like perfekte som det dei ser på sosiale medium. Det er direkte skadeleg, seier ho.

Steinstø har møtt mange som har opplevd fysiske plager som vondt i kroppen, smerter i magen eller sviktande pust. Etter kvart viser det seg at smertene kjem frå psykiske plager og sterk uro. 

– Når me då stiller spørsmålet: korleis har du det i kvardagen din? Så byrjar dei å fortelje. Kroppen din har kanskje prøvd å fortelje deg noko over lang tid, men du har ikkje høyrt etter. Til slutt seier kroppen ifrå om at du må stoppe, men då er det som regel langt over streken. Difor har eg så lyst til å motivere folk til å ta tak i ting før det går så langt, og sjukemeldingane blir mange og lange, seier Steinstø. 

– Gjer noko godt for deg sjølv, fyll på med god energi, ver ilag med fine folk og ta tak i det du kjenner på, er mitt råd.